美聯集團尋日一連公布幾件「喜事」,包括發盈喜,同埋授出購股權畀高級管理層。不過,最矚目嘅要算係主席黃建業粒掌上明珠黃靜怡終於坐正,由副董事總經理升做董事總經理,真係可喜可賀。

黃靜怡(左)喺集團做到好成績,爸爸黃建業(右)當然好開心喇!(資料圖片)

相信大家仲記憶猶新,美聯近年發生幾次「兵變」,即係多位高級管理人員辭職或被炒魷,部分原因都係話黃靜怡缺乏前線地產代理經驗。不過,問過美聯啲好姊妹,如果單係睇數據,集團近年市佔率、盈利都有改善,一班管理層包括黃靜怡在內真係功不可沒。

換言之,依家美聯共有兩位董事總經理,原董事總經理黃子華繼續留任,會專責政策推行及統籌銷售營運,而黃靜怡專責集團整體策略及發展方向。

第一手消息請下載on.cc東網iPhone/iPad/Android/Windows Phone Apps