為咗配合佔領行動，泛民立法會議員早前發起不合作運動，成功突襲立會財務委員會轄下嘅工務小組委員會同人事編制小組委員會，取得呢兩個小組委員會嘅控制權。不過，尋日由梁繼昌任主席嘅人事編制小組委員會開會討論政府增聘法官嘅建議時，泛民嘅「大舊」陳偉業同「慢必」陳志全提出嘅修訂就因泛民議員唔齊人，而畀建制派否決咗。泛民成日話建制派壟斷議會，但畀佢哋入到委員會、攞到控制權時又自動放棄，真係同生人霸死地冇分別。

設計圖片及對白

修訂全軍覆沒

人事編制小組委員會尋日開會討論政府有關增聘法官嘅建議。慢必同大舊就分別提出多個修訂。其中，慢必就動議不應聘用曾經喺處理案件時有嚴重疏忽、判刑過重同誤判嘅地區裁判官作為高等法院法官。而大舊就提出基於高院法官未來可能會處理涉及雨傘運動示威者嘅案件，故當局唔應該聘請支持或反對雨傘運動嘅人士任法官。

原本以為喺泛民人數佔多嘅情況下，慢必同大舊嘅修訂可獲通過，點知就喺泛民議員唔齊人嘅情況之下，畀建制派否決晒。而政府嘅開會建議亦喺泛民同建制派全數支持下得到通過。就連大舊都話，唔明點解喺泛民議員佔多數嘅委員會，佢哋嘅修訂都會被否決咁話。

另外，小組委員會尋日亦討論食物及衞生局有關延長兩個首長級職位五年，以處理自願醫保計劃統籌工作嘅建議。不過泛民議員就質疑當局計劃就呢個職位三年檢討一次，點解依家一次過延長五年。局長高永文就話以佢嘅判斷，係有需要延長有關職位至少三至五年嘅。不過「長毛」梁國雄就唔滿意，仲話高永文做番醫生嘅話唔會搵佢睇病，因為死梗咁話。搞到高永文即刻火滾，要求長毛收番言論。長毛最後當然冇理佢啦！

第一手消息請下載on.cc東網iPhone/iPad/Android/Windows Phone Apps