低津通過無期 政棍與民為敵
悠悠萬事，民生為大。不過對班惟恐天下不亂嘅反對派嚟講，應該係悠悠萬事，拉布為大至啱。嗱，反對派喺立法會搞不合作運動，阻住地球轉，基層市民望穿秋水嘅低收入在職家庭津貼，至今通過無期。呢班所謂議員，服務市民係假，玩死市民就真！
講起就激氣嘞，由於反對派不斷拉布，低津由上年度拖到今時今日都仲係冇聲冇氣，原本勞福局計劃最遲明年底發放津貼，家陣被迫押後到一六年第二季，如果反對派拉布仲唔收手，都唔知拖到何年何月。全港七十萬基層市民一等再等，仍需苦等，你話呢班政棍唔係與民為敵都冇人信喇。
鬼咩，呢班政棍呢頭狂吸民脂民膏，嗰頭懶理市民死活，正一神憎鬼厭。有建制派議員睇唔過眼，日前建議當局增加鼓勵就業交通計劃津貼，由每月六百元加至八百元，事關低津遲遲未能通過，而交津又有巨額盈餘，不如增加交津頂住檔先，幫補吓低收入家庭咁話。
即係咁，呢個建議無疑係出於好心，之但係咁做等於斬腳趾避沙蟲，解決唔到問題唔在講，反而會進一步助長反對派氣燄。事關問題根本出在滋事政棍身上，如果唔係佢哋不斷拉布，低津一早過咗關喇，基層市民使乜癡癡地等吖！最弊嘅係，同樣受拉布所阻嘅公務員加薪撥款，即使延遲獲批，仲有追溯期，但低津就冇得追溯嘞。所以話啫，反對派一日喺度累人累物，政府以至市民都唔使旨意有好日子過。
大家有眼見o架，呢班政棍開口民主普選，閉口關心弱勢，實際上完全相反，阻住低津通過只係冰山一角咋。呢，日前立法會扶貧小組委員會討論婦女貧窮問題，殊不知二十三名成員之中，只有六人出席，造成流會。原來缺席嘅十七名議員之中，唔少去咗佔領區抽水，邊係關心弱勢吖！邊係做正經嘢吖！
話時話，佔領鬧劇沒完沒了，早就天怒人怨喇，點知佔領搞手意猶未盡，日前突然「吹雞」發難，釀成血腥衝突，激起全城譴責。反對派見勢色唔對，竟然發聲明譴責埋一份，擺明劃清界線咁款。喂，神係你，鬼又係你，成件事你哋搞出來，點起火頭又想拍拍屁股走人，有冇咁便宜呀？
都係嗰句嘞，多行不義必自斃。反對派有破壞冇建設，市民睇喺眼裏，記喺心頭，遲早票債票償嘅咋，叮！
