城中鏡：夏哲偉自誇 跑贏全港CEO
咪以為做得CEO一定身懷一個肥肚腩，嚟自荷蘭嘅永明金融CEO夏哲偉（Wim Hekstra）身高六呎又GENTLEMAN，唔單只係保險界「高富帥」嘅代表，而且仲係「全港跑得最快嘅CEO」。
夏哲偉講笑話自己係「全港跑得最快嘅CEO」。（資料圖片）
阿Wim身形咁fit，一睇就知道係運動健將，平日除咗玩開足球、曲棍球同三項鐵人之外，上個月先啱啱贏咗UNICEF嘅三千米CEO RUN。對於跑半馬二十一公里都係只需要一小時三十四分嘅Wim嚟講，跑贏一班肥肚腩CEO可以話係無難度，佢仲講笑話記者識到全港跑得最快嘅CEO，約定下年一齊再跑過咁話。
Wim作為全港跑得最快嘅CEO，其實唔止跑步快咁簡單，佢加入永明短短一年，已經帶領旗下強積金（MPF）業務增長達百分之十八，跑贏同業。而佢嘅管治之道都同運動好有關，就係「Play win, don't play defense」，即係同出名擅長進攻嘅荷蘭足球員一樣，進攻就係最佳嘅防守，唔打防守戰，果然係嚟自荷蘭嘅代表。
