城中鏡：立會添滑雪機 姚總Like爆
話說喺構建添馬艦嘅新立法會大樓嘅時候，曾經諮詢過班議員新大樓應該有乜嘢設施，而好多議員都話因為平日開會繁忙，應酬又多，冇時間做運動，於是建議新大樓要有健身室，方便議員一有時間就可以去做吓運動，保持身體健康。點知新大樓都入伙咗兩年幾，班議員並唔係經常去健身室喎。
姚思榮盛讚部滑雪機好玩兼易用。
有見健身室嘅使用率偏低，立法會秘書處近日就增設一部滑雪機，希望可以吸引更多議員去健身。旅遊界議員「姚總」姚思榮盛讚部滑雪機好玩兼易用，又透露近期經常拉埋議員馬逢國一齊去健身室玩跑步機，最少跑二十幾分鐘，又話覺得兩個人一齊做運動可以起到互相督促嘅效果。
議員最忌係開會期間去健身，事關姚總有次跑跑吓步發現要投票，喺五分鐘內着番件恤衫同長褲跑落會議廳投票，之後上番健身室沖涼，都咪話唔狼狽。
