香港中文大學尋日舉行學位頒授典禮,其中最矚目係一二年諾貝爾文學獎得獎作家莫言,獲頒授榮譽文學博士學位。見佢喺台上致辭時,回想起當年第一次來港經歷,非常感慨。佢直言該次經歷令佢大開眼界之餘,仲造成思想衝擊,事關「在大陸,要排隊搶物資,在香港,商戶卻要求人來買」,令到佢見識到資本主義同社會主義嘅分別喎。

莫言笑話第一次去中大令佢充滿恐懼,因為無人識講普通話。

陳慧慧對培育青年不遺餘力。

王澍係首位獲得普里茲克建築獎的中國籍建築師。

三遊中大終成一分子

出身於農村嘅莫言,年少時經歷過勞動同飢餓煎熬。直到多年前,佢嚟到香港嘅中大翻譯研究中心做學術研究,擴闊咗佢嘅世界視野,見到香港到處都係高樓大廈及商場時,先第一次發現原來物資可以過剩。

莫言仲特別提到,當時有位外籍朋友邀請佢去食飯,「早上五點宰殺了一隻雞,到晚上十點都未煮好,這段時間夠我寫好一萬五千字短篇小說。」經歷嗰次香港之行後,佢就覺得原來外國人係咁認真又有耐性,對佢後來嘅寫作方面亦有所啟發,認為要熬湯咁熬出小說,寫出生活精華。

提到同中大嘅淵源,莫言笑話第一次去中大時充滿恐懼,因為身邊所有人都唔識講普通話,但第二次嚟嘅時候就已經無呢個障礙喇,今次第三次到中大,仲成為中大一分子添,感受很深。

中大尋日同時向南豐集團主席及董事長陳慧慧、中國著名建築師王澍及顧嘉煇頒授榮譽社會科學博士學位;美國麻省理工學院斯隆管理學院金融學講座教授Robert C. Merton、中國工程院院長周濟頒授榮譽理學博士學位,並向中大前校長劉遵義頒授榮譽法學博士學位,表揚及鼓勵佢哋對社會各方面嘅成就同貢獻。

第一手消息請下載on.cc東網iPhone/iPad/Android/Windows Phone Apps