政壇：搞搞政：監警會新班底換湯不換藥
喺佔領行動爆發後，獨立監察警方處理投訴委員會主席郭琳廣同個別委員嘅表現備受外界質疑。監警會新一年將會大換班，做夠六年副主席嘅立法會議員林大輝同地產及建造界議員「大舊石」石禮謙將同時卸任，換上同背景嘅議員。
設計圖片及對白
擔任政府公職一直有不成文嘅「六六規定」，即同一個人唔可以擔任同一公職工作超過六年，以及唔可以同時出任超過六項公職。
據聞由於大輝當年係以「散人」形式獲得委任，而大舊石係因為「專業會議」而被委任，所以監警會喺物色新一屆副主席人選時，都以「散人」同商界政黨為大前提，最後分別搵咗「六散人」之一嘅建築、測量及都市規劃界議員謝偉銓，以及同大舊石一樣屬經民聯嘅金融服務界議員張華峰出任副主席。不過，由於佢哋都係建制派，估計接任後都只係換湯不換藥。謝偉銓接受查詢時唔肯回應委任消息係咪屬實，只係話現任副主席任期尚未屆滿，一切有待有關當局公布。
再睇番現任委員，港大法律系首席講師張達明同前社聯行政總裁方敏生都夠鐘卸任，估計為免引起外界不滿，當局都會搵番有類似背景嘅人士接手。至於曾惹爭議嘅現任委員梁繼昌同「一舊雲」黃碧雲，雖然佢哋早喺八月底前接獲通知續任兩年，但由於近期被反佔中人士質疑佢哋喺處理警察投訴時立場偏頗，梁繼昌尋日就自爆擔心政府突然唔同佢續約添！究竟當局點樣整頓監警會，相信好快自有分曉。
