位於機鐵九龍站上蓋嘅圓方商場除咗係藝人拍拖勝地外,原來仲係公務員泊車嘅新竇。話說受佔領行動影響,平日駕車返工嘅公務員唔少都被迫放棄開車,改搭公共交通工具返政府總部,對於居住港島嘅公務員尚算方便,但遠在新界嘅同事要日日坐個幾鐘車返工就比較麻煩啲嘞。部分公務員就諗到新招,索性駕車到圓方、轉一程機鐵到香港站再步行返政總,既方便又快捷。

受佔領行動影響,唔少公務員改搭公共交通工具返政總。(資料圖片)

公務員返工變招層出不窮,而佢哋鍾情圓方泊車唔係無原因,雖然要自費泊車,但停車場時租唔貴,閒日返工時間泊車冇人爭,慳番兩程西隧收費之餘,轉機鐵亦更能掌握返工時間,無懼受塞車影響而遲到。講到尾,公務員萬水千山返工除咗服務市民,都係為咗份糧啫,但公務員加薪動議受立法會財務委員會「拉布」影響,遲遲未有好消息,仲嬲過佔領人士塞住條路阻返工。

第一手消息請下載on.cc東網iPhone/iPad/Android/Windows Phone Apps