建制派議員Ann蔣麗芸喺立法會發言經常都令人精神為之一振，但似乎議會嘅平台都未能滿足到佢。近日阿Ann就計劃做埋節目主持，將會開設一個名為「蔣麗芸會客室」嘅節目，邀請城中知名政治人物到「會客室」傾偈。呢個錄影節目會喺下月一日元旦在社交網站首播。莫非阿Ann想同泛民議員劉慧卿嘅網台節目一較高下？

蔣麗芸話希望喺節目中同嘉賓「風花雪月」。

阿Ann話雖然認識好多政圈中人，但就唔打算喺節目內同佢哋講政治嘞，而係希望「風花雪月」，講吓私生活等比較感性嘅話題。阿Ann仲透露，「會客室」打頭炮邀請嘅嘉賓就係立法會議員譚耀宗，但就明言到時唔會講政改，而係傾吓譚Sir嘅心事喎。

雖然阿Ann打算元旦「開台」，但就一集節目都未錄影，皆因「會客室」仲差兩張櫈。原來佢為咗個節目特登去買咗兩張櫈，但就因為「會客室」設於立法會辦公室，而附近交通又受佔領行動影響，所以傢俬舖唔肯送貨。為免首播日冇嘢睇，佢已決定唔等傢俬舖送貨，自己派司機去提貨嘞！

第一手消息請下載on.cc東網iPhone/iPad/Android/Windows Phone Apps