立會充斥無間道 引狼入室太不該

成件事係咁嘅，話說佔領行動無以為繼，學生搞手希望盡地一煲博翻盤，日前唔止將行動升級，仲暴力升級，號召圍堵政府總部，釀成流血衝突，七國咁亂。最匪夷所思嘅係，喺雨傘警棍橫飛嘅混亂關頭，學生搞手竟然大模廝樣喺立法會大樓遙控亂局，成為呢場衝擊鬧劇中最荒謬最諷刺嘅一幕。堂堂立法會，唔止窩藏嫌疑犯，仲淪為違法行動指揮中心，成何體統吖？法治何存吖？唔怪得香港變得愈嚟愈是非不分，愈嚟愈法治蕩然喇！

大家可能覺得奇怪，立法會大樓假假哋係政府建築物，點解會淪為無掩雞籠，任人自出自入安營紮寨呢？答案好簡單，咪因為有洋奴漢奸，引清兵入關囉。其中一名反對派議員梁國雄承認，當日有邀請佔領搞手進入立法會，不過就死雞撐飯蓋，話唔係指揮佔領，只係普通探訪喎，咁牽強嘅大話都講得出，簡直係侮辱市民嘅智慧。強大民意壓力之下，立法會終於急急補鑊，向梁國雄及李卓人等三名「無間道」議員發出警告信，並制訂多項補漏措施，包括規定訪客不得擅自過夜等。

你話醜唔醜吖，立法會變違法會，民意代表變違規代表，香港有一個如此不堪嘅議會，簡直丟架。話時話，立法會藏污納垢，唔係始於今時今日嘅嘞。自佔領行動爆發以來，呢座議事殿堂已經變成示威者嘅賓館、浴室同貨倉，仲曾經喺垃圾桶發現安全套包裝盒，市民唔知仲以為「門常開」開咗間時鐘酒店添。政客自甘墮落，引狼入室，醜聞簡直數不勝數。上年立法會審議財政預算案期間點算開會人數時，反對派議員助理居然離譜到干擾升降機運作，以圖阻撓議員進入會議廳，結果被以「干預議員」罪起訴。

唉，好心班議會政客啦，要搞事都喺外面搞吖，將莊嚴嘅議事場所搞到烏煙瘴氣，唔通呢啲就係議員嘅責任？之不過咁，反對派攪亂檔係正常嘅，佢哋集體收受政治黑金，甘當外國勢力嘅棋子，唔搞到香港永無寧日，又點交差吖。各位市民，認住呢班唯恐天下不亂嘅政客，將來記得用手中神聖嘅一票，將呢班牛鬼蛇神掃地出門吖，叮！