城中鏡：雷軍攻「雲」三年擬擲78億
小米科技董事長雷軍同時亦都係金山軟件嘅董事長，當年金山嚟港上市，雷軍出力不少。其後雷軍因為要全力打造小米成為可以媲美蘋果公司（Apple Inc.）嘅智能手機王國，於是乎就淡出金山。之不過，雷軍身為金山人，自然唔會忘記金山，佢啱啱就公開未來三年戰略重點是旗下從事雲技術開發嘅「金山雲」，承諾喺未來三至五年內將向雲業務投入十億美元（約78億港元）。
雷軍制訂咗「All-In 雲」嘅三年戰略。（資料圖片）
好似近排，金山軟件就聯手小米，同埋新加坡淡馬錫一同入股中國最大互聯網基礎設施服務商世紀互聯 ，呢個咪係雷軍稱呼為金山「All-In雲」戰略嘅重要一步。
雷軍話已制訂咗「All-In 雲」嘅三年戰略，因為雲業務會係金山業務開闢新局面嘅關鍵突破口，大拿拿十億美元嘅前瞻性資金投入係完全值得嘅，而早前投資世紀互聯就係其中關鍵嘅一步。
世紀互聯主要提供數據中心託管、雲計算等服務。按各方達成嘅合作協議，未來三年，金山計劃至少租用五千個機櫃，世紀互聯成為其提供數據中心支援嘅重要合作夥伴。
