城中鏡：世界傑青羅寶文 邀晶晶襄善舉
富豪酒店集團副主席Poman羅寶文榮獲世界十大傑出青年，尋日除咗賀宴外仲即場宣布創立「寶狄慈善基金」，好多城中名人都嚟道賀，更邀得郭晶晶擔任慈善基金大使，晶晶仲話等囝囝大啲，會帶佢去山區做慈善探訪，等囝囝睇睇不一樣嘅生活。
羅寶文（右）大讚郭晶晶（左）係年輕人嘅典範，無論家庭同事業上都係好榜樣。
善心爆棚嘅「鯊魚女」陳細潔都嚟撐場，以示支持。
作為香港十大傑青嘅龐愛蘭，亦有到場祝賀羅寶文獲世界傑青。
Poman喺台上致辭時不禁嗚咽，並感謝家人、朋友及同事支持，佢爸爸羅旭瑞更即場為愛女獻唱，當作禮物送畀佢。及後，Poman與多名好友一同合唱，更不時與父親相望對唱，場面溫馨。最後，羅旭瑞更以私人名義捐出一百萬元畀慈善基金。Poman話成立基金會係佢嘅夢想，「最重要係活在當下，貢獻畀世界，希望回饋社會」。
跟住佢仲大讚晶晶係中國人嘅驕傲，憑自己努力而攀上事業嘅高峰，亦係年輕人嘅典範，家庭方面係一個好媽媽，無論家庭同事業上都是好榜樣。佢透露基金嘅成立目的係推廣關愛訊息，宣揚小朋友應有追尋夢想嘅勇氣，以及幫助山區或第三世界嘅小朋友，讓佢哋有學習機會。
晶晶欲帶愛兒訪山區
問到晶晶將來會唔會帶囝囝到山區作慈善探訪？佢坦言囝囝依家只係一歲多，等佢大啲再帶佢去，讓佢看一看不一樣嘅生活。咁囝囝依家識講嘢未？佢話：「會說爸爸、媽媽。還不會說爺爺。」追問有冇畀囝囝上學前班增強競爭力時佢話：「沒有想，只讓他接觸多些小朋友，快樂地成長。」
問佢同啟剛啱啱結婚兩周年有冇慶祝時，佢笑言：「沒有，但有禮物。」叫啟剛送BB畀你？佢話：「已經有一個嘞！」而提到早前《好報》獨家拍得佢買二十元嘅平價小孩衣服，問佢係咪一直都精打細算唔買名牌時，佢話：「看甚麼東西，有些好東西不一定要品牌。」
