香港阿哥電視台收視日低，除咗節目質素不堪入目外，內部嘅人事鬥爭仲白熱化到街知巷聞，成班戲劇組高層大媽，當個電視城係長安大街後的故宮，自己上身做妃嬪扮慈禧，勾黨結派搵私利，佢哋呢棚肥版江青內訌戲碼，仲激烈誇張過出街劇集，烏煙瘴氣，外間嘅觀眾點會有認真製作嘅好節目睇吖？

阿哥台戲劇組崩壞，還不及佢哋新聞部咁低能，打壓出色員工不在話下，家吓啲新聞報道，不是有立場偏頗，就是不盡不實，是是旦旦，與事實不符。

嗱！前日，阿哥台新聞報道旺角「鳩嗚團」令到一間牛仔褲店要拉閘「避禍」，又話呢班團友再出去達旁的小巴站「引起騷亂」。單看呢段新聞片，肯肯定觀眾會將這班「鳩嗚團」定性為搞事分子，查實，大家有無諗吓，旺角咁大，咁多舖頭，呢班團友卻特登要去呢兩度「搞事」呢？

嗱！讓目擊證人的我，講個真相，說個明白吧！

事實係，再早一日之前，當一大班「鳩嗚團」響應政府一男子呼籲到旺角消費，巡經那牛仔褲專門店時，店內的店長撲出門口指人大罵，觸發口角，繼而店長仲郁手郁腳添！後由警員調停。咁！前日，竟有團友不計前嫌，組隊入去幫襯，哈！世事奧妙，店員見顧客多而召警看舖，期間，當然有人「真購物」呀！哈哈！

至於去先達商場旁的小巴站「鬧事」，咁確要講公道話，那段通菜街簡直無王法的，小巴擺滿三條行車線，仲在快線上落客，差人從不去執法。家陣，市民只係要求警方依法抄牌，勿選擇性執法，有法不依啫！咁都有罪？咁算搞事？仲有呀！旁邊百老匯電器舖門外，日夜成班大陸人「非法」擺賣iPhone同阻街，幾時見過有差人驅趕？

有網民「集資」每人一蚊向法庭申請禁制令要通菜街「清理」小巴阻街犯法行為，值得支持呀！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊(目及)實政府

第一手消息請下載on.cc東網iPhone/iPad/Android/Windows Phone Apps