政壇：泛民拉布三幅被嘥公帑

話說工務同人事編制兩個小組分別有十二同十八項逾期加入申請。繼工務小組前日開第二次特別會議後，尋日人事編制小組亦都開特別會議處理申請。會議一開波，泛民議員胡志偉同梁耀忠就提出因為十八位議員嘅申請理由唔同，應該分開考慮。議員李卓人同郭家麒就質疑，有建制派議員話因助理出錯或疏忽嘅講法係老屈，覺得要請班議員，甚至佢哋嘅助理到會解釋。其實泛民呢個老屈論喺之前嘅會議都講過，尋日又再循環再用嚟「拉布」啫。

黃定光狠批「耍花招」

建制派議員李慧琼就反駁，話議員加入小組係履行職責，無論乜嘢原因都應該接受，唔需要分開處理申請，否則係縱容泛民「拉布」。議員黃定光仲批評梁繼昌喺度耍花招，「山水有相逢」咁話。可惜梁繼昌最終都係決定要分開處理申請。

由於有份申請逾期加入嘅保險界議員陳健波，已表明唔會再出席有關會議，亦唔會有補充解釋，所以大家就先處理佢嘅申請，最後當然被否決啦！梁繼昌之後仲叫秘書處睇下其餘十七位申請人有冇補充解釋同擇日再開會，擺明就係拖得就拖，睇嚟一朝得勢嘅泛民仲有排玩，繼續倒公帑落鹹水海。