高層吞假可榮休 消防醜聞爆不休

係咁嘅，本報踢爆一位啱啱退休嘅女消防隊長級人員，涉嫌過去五年冇將休假輸入電腦，但實際放咗假，足足「吞」咗超過六十日假，涉及十六萬公帑。話時話，如果唔係早前有救護員涉嫌以同類手法「吞假」，管理層要求全處上下核對更表同電腦紀錄，呢十幾萬補水可能已經袋袋平安咯。

不過揭發出嚟又點吖，聽講呢位女消防隊長唔單止毫髮無損，可以印印腳如期「安全」退休，仲獲同袍舉行歡送會光榮引退添，真係唔到你唔服。之但係做細嘅就冇咁好彩嘞，上述嗰位涉嫌「吞假」嘅救護員，雖然只係講緊幾日，但由於佢未過試用期，處方一啲都冇手軟，報警處理之餘仲即刻革職；至於其他斷正嘅十幾個救護員，雖然唔使執包袱，但都要喺半年內「守行為」。

嗱，大家見到啦，同樣涉嫌呃假，居然有三種處理手法，呢啲咪一處三制囉，仲要係刑不上高層嗰隻添。正如有前線人員話齋，理論上員工放假，事前要經系統提交申請並由上級審批，但實際上過去多年部門都無嚴格執行規定，從來冇人過問，大批同事紀錄有錯，根本就係管理層監管不力，家陣出咗事唔使問責，淨係前線人員祭旗，公平何在呀。

冇計啦，鬼叫你唔係大sir咩，唔恨得咁多o架啦。嗱，高級消防官僚真係好大權，分分鐘可以隻手遮天o架。消防處早排內部招募救護學校助理教官，要求各區提名隊目同總隊目，由於人工同職級都三級跳，吸引唔少人投考，點知最終獲選者裏面，竟然有人資歷唔夠秤。鬼咩，有前線踢爆，原來有救護學校高層懷疑背後發功，力挺自己友，朝裏有人好辦事，中選梗係無難度喇。

哦，咁就明晒嘞。原來走上層路線有咁多着數，唔怪得擦鞋文化牢不可破啦。第樣唔講，齋講每次新舊處長交接，例必動用大量人力物力財力，甚至抽調最先進裝備，搞場大龍鳳，又檢閱又演習，仲出動埋前線人員做知客，直頭威過威士忌。喺呢啲官僚眼中，消防裝備係做騷嘅「道具」多過救人滅火嘅工具，處方咪買埋買埋好多好睇唔好用嘅垃圾囉。

一句講晒，消防處不務正業，亂象叢生，早就有口皆悲。「消閒處」呢個名，睇怕都係吟詩都吟唔甩o架嘞，叮！