城中鏡：何俊賢小登科 粗金鏈搶鏡
立法會漁農界議員「高佬賢」何俊賢前晚小登科，迎娶拍拖三年嘅社工女友Elain，喺元朗一間酒樓大排筵席，一班官員同議員好友到賀。
何俊賢（右二）同Elain（右一）日前擺婚宴，立法會同僚陳恒鑌（左一）同食物及衞生局局長高永文（左二）都有到賀。（陳恒鑌提供）
當晚高佬賢身穿中山裝，同埋戴上粗金頸鏈，睇落增添幾分江湖味。佢話喺上周六簽紙結婚，但由於未能預訂當日嘅酒席，所以要延至前晚先擺酒，笑言事後睇番呢個安排仲好，唔使由朝搞到晚咁辛苦喎，而當日接新娘前仲可以先食個魚蛋河添！
問到婚後去邊度月，高佬賢透露太太想去馬爾代夫，但佢覺得有啲貴，所以未有最後決定喎。話時話，立法會議員每月薪酬近九萬元，高佬賢唔係咁孤寒吓嘛？
