城中鏡：趙哲妤孖綠魔 樂聚「老友記」
「家有一老如有一寶」，「老友記」們累積咗豐富嘅人生經驗，絕對係身邊嘅寶物。平日愛結伴當義工嘅2010年中國小姐香港區冠軍Uny趙哲妤同好友「綠魔」Karl許嘉浩，日前清早到荃灣出席敬老行善活動，同逾五百長者齊享健康素宴同表演同樂，佢哋仲即場請教老友記嘅長壽養生之道，又話將來會嘗試抽空一周食素一次，令生活更輕盈健康。當年屆八十二歲嘅「修哥」胡楓健步如飛彈跳上台表演唱歌時，更令台下嘉賓同長者朋友聽得如癡如醉，讚嘆修哥為娛界長青樹，要向其生活養生法偷師。
趙哲妤（右二）同許嘉浩（左二）愛行善，更希望多抽時間同「老友記」談天。
Karl話屋企係大家庭，親戚眾多兼且自小為鄰，晚上仲會大夥兒齊集食飯，所以自小與爺爺同嫲嫲關係相當密切，仲成日飲茶談天遊玩。Uny亦話從小就愛跟「老友記」交談，遇上生活上工作上以至情感難題時，亦會向呢啲人生經歷豐富嘅「老友記」盡訴。
喺活動最後，兩人當然不忘親手為參與嘅「老友記」送上日用品福袋，同埋真誠嘅祝福喇！
