政壇：搞搞政：陳維安化身看更親身坐鎮防「佔立」

自備睡袋 只敢小睡

據聞立會秘書長陳維安都唔敢怠慢，仲化身超級看更點對點巡視大樓，話說佢前日下午四時喺立會親自督師跟進最新情況。直至尋日凌晨四時左右先返屋企稍事休息，前後直踩十二小時。但不消一會，早上六時半又返回立法會坐鎮。同一時間，據說立法會總保安主任亦有「通頂」留守，直至昨早十時才離開。

陳維安承認前日下午開始留守立法會，自言要親身喺現場了解情況先至放心，期間同總保安主任商討同預計可能會發生各種情況，以及相關應對策略等。當問及係咪無乜時間瞓覺休息，佢話秘書長房間有梳化，自己亦有準備睡袋，但就算瞓都只係敢小睡片刻，驚一陣瞓大咗出事就麻煩。

立會大樓亦因應最新情況加強保安，據知大樓合共四個出入口，依家只開放一個，並需要拍卡或登記才可進出。為防有人裏應外合突擊佔領會議廳，據聞連大樓內電梯都有特別安排，其中近會議廳嘅三部電梯，會封鎖前往會議廳、秘書處等樓層，要乘搭較遠嘅電梯才可前往會議廳。

之不過，行管會只要一日唔限制議員夜間帶訪客出入大樓，一日仍存在危機。夜晚仲帶訪客去辦公室開會？議員有咁勤力嘅咩？