被踢出全國政協後,立法會議員「田少」田北俊連富貴黨黨魁都一併辭任埋,黨領導層因而作出「微調」,尋日宣布由方剛接棒黨魁、鍾國斌升格任主席、邵家輝任副主席,而田少就再度夥拍周梁淑儀同劉健儀任榮譽主席。外界盛傳立法會議員林大輝「如無意外」最快下月入黨,甚至做埋黨魁,可惜方剛表明唔想做最短時間嘅黨魁,最多安放大輝喺新界東喎。

方剛

田少因做「壞孩子」敢言而惹搣柴之禍,方剛表明唔做「田少二號」,甚至田少嘅扯線公仔,笑言「今時今日要我扮田少角色,我點識扮呢?扮出嚟都唔似囉!」堅持以其一貫作風處理黨務。

打亂大輝入黨算盤

過去幾年,田少一直想大輝入黨,屬意對方接棒黨魁兼出戰新界東直選,傳聞亦開始轉入大直路。不過,啱啱升格黨魁嘅方剛話,個人好樂意退下來,「但(做黨魁)一個月好似短咗啲囉」,無意為咗大輝再改選,只係話大輝「喺新東比較着重啲」。照咁睇,大輝明年入黨做黨魁嘅如意算盤似乎打唔響喇,唔知會否影響佢入黨嘅意願呢?

第一手消息請下載on.cc東網iPhone/iPad/Android/Windows Phone Apps