政壇：投資高手謝佩蘭都要搵人理財
依家樓價物價樣樣都貴，難怪香港人個個話儲唔到錢，若果你以為「第一桶金」仲只係以前成日掛喺口邊嘅100萬，就真係太天真啦！根據友邦一項調查，大家心目中嘅「第一桶金」，已經跟隨樓價升到去200萬。有三成受訪者仲話要有第一桶金，除非中六合彩啦!
謝佩蘭指出，有三成受訪者認為要有第一桶金，除非中六合彩。（資料圖片）
35%受訪者屬「月光族」
儲第一桶金咁難，友邦市場及業務策略Bonnie謝佩蘭就話，唔想做「月光族」月月清，最好就梗係搵個理財專家幫吓手嘞！Bonnie講自己親身嘅經驗，佢話雖然考咗好幾個投資牌照，但仍然請咗一個理財顧問畀投資意見，希望客觀啲咁話。
佢仲分享，友邦呢份調查又顯示，有三成五受訪者都屬於月月清嘅「月光族」。而其實每兩個香港人中，只有一人有儲蓄習慣，每月能夠有固定儲蓄嘅更只得一成人。
