政壇：胡曉明：藐視法庭枉為師

胡曉明尋日喺電台節目上話，大學生近月喺畢業禮上嘅行動，城大一直都畀學生有表達意見自由，畢業禮上希望學生尊重學校同埋其他學生。佢話畢業禮場合係屬於大家，學生喺畢業袍上有掛飾物嘅自由，上台時如行為唔太過分都無所謂，除非喺台上行動持續太耐先會被安排落台。

佔領行動近日升級，被捕者不乏學生，甚至有大學教職員，而佔中三子亦講過會去自首。胡曉明話，如果大學生一旦被法庭定罪，甚至判刑，城大會作個別處理，可以返嚟嘅都會畀佢返，希望循循善誘令學生返回正途。不過，對於教職員就唔會咁寬鬆喇，雖然唔多唔少都會畀機會，但教師亦需要自行檢討，學校設有紀律委員會就事件嚴重性作討論，再向校方提出建議。

盼青年學懂分輕重

胡曉明舉例話，如果教師被判定罪藐視法庭，就唔應該從事教育工作。唔知香港大學校長馬斐森同中文大學校長沈祖堯係咪都應該倣效一下，對處理違法嘅教授表態呢？大學生係今次佔領行動嘅主要骨幹，胡曉明話曾經去過佔領區同青年人傾過，話相信部分年輕人只係「跟人做」，仲話有後生仔同佢講唔嚟唔得，否則會冇晒朋友喎，佢話希望年輕人經一事、長一智，日後懂得分事情輕重，多啲判斷。