出街隨時中菠蘿,甚至被亂槍掃成蜜蜂竇……唔好誤會,太一叮唔係講緊烽煙四起嘅伊拉克或者敍利亞,而係號稱「最安全城市」嘅香港!

太一叮一啲都冇誇張o架,尋日凌晨之嘛,大圍顯徑邨發生爆炸案,兩名男女受傷,其中男嘅被炸斷三隻手指。據講佢哋係流浪動物組織嘅義工,之前喺郊野公園發現一隻燒鴨,懷疑係用嚟誘捕野豬嘅毒餌,諗住好心執走佢啦,點知一拆開即刻中招。所以話啫,以後喺街見到可疑物體,都係行遠啲好。

不過咁,菠蘿易防,明槍難擋。又係尋日,兩位年輕人喺天水圍天恒邨傾傾吓偈,三名戴口罩嘅氣槍槍手突然從暗角殺出,不由分說狂掃一輪,期間一名紋身彪形大漢路過,一樣成為槍靶,被射到周身傷。嗱,咪睇小氣槍嘅殺傷力呀,如果「升呢」升得夠勁,殺人話都冇咁易o架。

講開又講,氣槍傷人時有所聞,但槍手多數都係匿埋一邊放冷槍,好少好似今次咁明目張膽。點解兇徒咁猖狂?當局對非法改裝氣槍監管不力,固然難辭其咎,但更加重要嘅係,今時今日香港地法治崩壞,犯法有理大行其道,你都咪話,嗰幾個氣槍狂徒分分鐘以為好有型,當正自己拍緊英雄片呀!

大家只要睇番成場佔領鬧劇,就知太一叮冇講錯o架嘞。非法霸街被講成「公民抗命」,暴力衝擊完自首被講成「彰顯法治」,政客更鼓吹「不守法絕非等同不尊重法治」,咁仲唔係法治崩壞,是非顛倒?最離譜嘅係,班佔友左一句「勿忘初衷」、右一句「愛與和平」,表面正氣凜然,實際污糟邋遢,偷竊、非禮、打交、染黑瓣瓣齊,依家居然發展到恐嚇要炸差館、燒政總,咁落去仲成世界嘅!

犯罪學有一個著名嘅「破窗理論」,如果有窗戶爛咗唔整番好,其他人會有樣學樣搞破壞,繼續坐視不理,最終隨時殺人放火收場。香港地愈來愈多人違法當食生菜,咪就係以為法不責眾,可以有恃無恐囉。所以家陣乜都假,最緊要係有法必依,唔理你咩陣營咩立場,有人違法就拉,有人暴力就鎖,否則嘅話,香港遲早淪為罪惡之城嘅咋。

始終都係嗰句,佔領拖累經濟,仲可以慢慢恢復,百幾年辛苦建立嘅「法治之都」金漆招牌一旦打爛,就真係冇得救啦,叮!

第一手消息請下載on.cc東網iPhone/iPad/Android/Windows Phone Apps