大搜查：茶具館懷舊展覽 鄧民亮回味童年
中國飲茶文化源遠流長，適逢茶具文物館今年三十周年，為紀念前市政局議員「維他奶之父」羅桂祥當年爭取以原駐港英軍總司令官邸「旗杆屋」活化，促成該館，將舉辦「從豆奶到普洱」展覽，同場展出八十套珍藏茶具同懷舊維他奶瓶，兩者可謂相映成趣。香港藝術館館長鄧民亮話，睇展覽時，不單只看到古老茶具，仲見到好多與童年生活有關嘅片段，回味童年就好似飲茶時嗰種回甘嘅感覺。
茶具博物館踏入三十周年，鄧民亮介紹將舉辦「從豆奶到普洱」展覽。
據知今次展覽特設「懷舊角」，將部分場地打造成舊式士多模樣，當中唔少展品仲別具一格。鄧民亮話如果家長帶小朋友來看，小朋友一定喜歡「巧色杧果壺」。呢款壺外形同杧果一模一樣。佢仲透露呢個咁得意嘅壺，出自二十世紀後期七大工藝師蔣蓉之手，當年坊間爭相仿製。另有清末名家邵大亨製作嘅「魚化龍壺」，壺鈕上嘅龍頭裝飾，一倒茶便會動，再倒茶還會伸出龍舌，非常罕見。
