大搜查：KK攝位成功 興田邨插旗
工聯會立法會議員KK黃國健近日喺藍田興田邨開設九龍東第四個地區辦事處，尋日特意舉行辦事處開幕典禮，仲邀請到食物及衞生局局長高永文、運輸及房屋局副局長邱誠武、工聯會會長林淑儀等人擔任主禮嘉賓。KK透露一早有意喺區內攝位插旗，奈何邨內一直都無「吉舖」出租，但喺幾個月前，觀塘區委任區議員潘兆文因病離世，KK即時向房署入紙申請接收「潘辦」，最後如願租到舖位。
黃國健（右一）話唔介意接收「潘辦」，左一、二為觀塘區議員簡銘東同何啟明。
邱誠武話當局會研究設置藍田北站方便居民出入，搞到台下觀眾非常開心。
林淑儀（左）同（右）陳婉嫻批評雙學唔肯撤離係不負責任。
KK最新嘅辦事處位於興田邨美田樓地下，呢個舖位一直由四位委任區議員共同使用，但今屆就得番博愛醫院前主席潘兆文用晒成個議辦。可惜好景不常，潘兆文喺幾個月前因突發心臟病去世，議辦因而丟空。由於原區區議員、白鴿黨陳汶堅喺區內另一屋苑已經開設議辦，加上KK又唔想成日借用其他黨友嘅辦公室，佢於是向房署申請原來屬於潘兆文嘅舖位，方便佢派社區主任服務區內街坊。
研設藍田北站 邱誠武贏掌聲
興田邨位處山腰地帶，行去最近嘅藍田地鐵站都要用成十五至二十分鐘，唔少居民希望港鐵日後興建嘅觀塘北線，可以途徑興田邨一帶，令佢哋有更多選擇。唔知係咪知道街坊有咁嘅訴求，邱誠武尋日致詞時，向居民大派定心丸，話當局知道藍田北居民出入，並唔似得其他居民咁方便，佢會再同工程人員研究喺藍田北設站嘅可能性，成功博得台下觀眾嘅唔少掌聲。
佔領行動開始至今超過兩個月，佔領人士至今未有撤退嘅迹象。林淑儀批評各界已經力勸雙學盡快撤離，可惜雙學領袖都係「得佢講無人講」，更鼓動群眾喺旺角進行挑釁行為，覺得警方同佢哋出現推撞都係無可厚非。榮譽會長陳婉嫻就話，學民思潮召集人黃之鋒日前質疑法官唔畀佢去旺角一帶，搞到佢出街唔多方便，認為佢哋發動「佔中」堵塞馬路，同樣搞到好多市民唔方便喎。
