政壇：搞搞政：約人對話放飛機 葉劉狠批周永康

葉劉首先透露，有七十名中產選民曾要求佢幫手約學聯代表見面，起初見面地點係旺角，之後改到中環，最後約定於金鐘添馬公園，最終中產選民有數人赴會，之不過等咗個幾鐘，等到下大雨之時，都唔見學聯正副秘書長周永康同岑敖暉二人嘅蹤影。佢聽聞周永康等人成日遲到，質疑佢哋未入社會做過事，自己組織唔到自己，唔識同人妥協，舉例指周永康遲到，至少遲到一個小時。

冀市民用選票表態

講到依家佔領行動，有前高官更預言未來兩年或出現暴動，葉劉話對此唔係好擔心，但承認佔領行動依家好大規模、前所未有，加上有執達主任被包圍等情況先後出現，強調未來兩年有兩場大型選舉，無論係支持定反對佔中，希望選民用選票呢個機制表達意見，然後接受結果，唔好再去搞各種群眾行為，去逼政府做一些事情。

對於佔領行動衍生嘅青年問題，佢認為涉及物資同非物資兩個層次，亦有青年係為咗追求公義，強調依家人心浮動，純派錢唔可以根治問題，最重要係脫貧同做好社會經濟結構改革工作喎。