政壇：陳新滋寧捱鬧 不討好學生
喺明年六月任期屆滿嘅浸會大學校長陳新滋，早前喺多場畢業禮上拒絕向舉黃傘上台嘅學生頒發畢業證書，事後惹來部分學生質疑批評。陳新滋尋日喺電台節目再次剖白，指由於即將卸任校長，有必要喺佢最後一場畢業禮中，向家長闡明浸大嘅辦學宗旨同追求嘅價值，如果因為擔心被攻擊而百般討好學生，反而係害咗佢哋。
陳新滋話如因擔心被攻擊而對學生百般討好，反而係害咗佢哋。（資料圖片）
陳新滋再三強調，當日拒絕向該幾名撐傘嘅畢業生頒發證書，係要保持畢業禮莊嚴肅穆嘅形象，又話大學會堂係一個神聖不可侵犯嘅地方，唔希望被政治搞亂。佢強調出席畢業典禮就好似出席婚禮或葬禮，學生應該尊重當時正在進行嘅典禮儀式，而唔應該肆意搗亂，又引述孔子嘅主張，認為學生應該克己復禮，以仁義為本，唔應該因為自以為自己無錯，而罔顧法律。
