政壇：何君堯越級狙擊AV仁

何君堯近年喺鄉事派極速彈起，一一年取代鄉議局主席劉皇發做屯門鄉委會主席，更傳有意參選立法會選舉。可惜日子耐咗，鄉紳似乎對何君堯都有啲意見，於是要求發叔回歸嘅聲音此起彼落。假如發叔重奪鄉委會主席，變相何君堯喺屯門區議會嘅當然議席、以至鄉議局執委都一併輸埋，變相「三失」。因此，有傳佢早於舊年已密會中間人，尋求轉戰區議會直選，據知有關方面「安放」佢同白鴿黨嘅立法會議員「AV仁」何俊仁打對台。

或攻陶錫源 博鄉紳支持

其實何君堯有意狙擊AV仁絕非空穴來風，佢上周就以「保衛中環」運動召集人身份，帶隊到AV仁嘅屯門辦事處踩場，抗議AV仁身為律師，帶頭違反法庭就佔領行動頒下嘅禁制令。不過，雖然AV仁因「艷照門」事件令民望跌至冰點，但有指AV仁扎根屯門多年，加上樂翠選區以城市人為主，何君堯搶攻都有啲難度。

不過，世事無絕對，工聯會「小花」劉桂容就曾喺一一年元朗區議會選舉富恩選區擊敗立法會議員李卓人，若何君堯贏到AV仁，AV仁就連下屆立法會超級議席「入場券」都冇埋。

至於另一說法係何君堯轉向挑戰身兼屯門鄉委會首副主席嘅陶錫源，陶過去幾屆區議會選舉均自動當選，加上該區係鄉紳集中地，何君堯出戰未必冇機會，但相信陶勢必攬住個位唔肯放。

我哋就鄉紳倒「堯」、延續「皇」朝問過何君堯，佢神態自若回應稱「睇吓點！」又話新界鄉紳一向都係「獨特地傳統」，但世事冇絕對，發叔參選都係好事，但佢個人就未有具體參選計劃喎。