消防迫害小業主 添煩添亂添民怨

係咁嘅，西灣河同筲箕灣一批舊樓業主日前召開控訴大會，話最近收到消防處通知，要求佢哋按法例規定，加裝天台水缸、水泵同喉轆等消防設施，雖然大部分業主都好合作，願意夾錢，但係遇到唔少困難，例如樓宇太舊搵唔到消防公司承判，即使有公司肯做，專業人士評估過認為費用高昂，消防處亦未必批。咁都未算，有大廈要喺天台加裝水缸，被業主拒絕，結果裝完喉轆後冇水用，搞到兩頭唔到岸，都咪話唔閉翳。

你知啦，好多舊樓業主都係基層長者，邊識處理咁複雜嘅問題吖，無奈之下惟有向消防處求助，點知對方唔幫手不特止，仲大發官威，揚言要控告班小業主，甚至出言恐嚇，問業主「知唔知花園街燒死幾多人」。最離譜嘅係，有業主喺大廈加裝水缸後，居然被屋宇署發信指水缸係僭建物，要求清拆。消防處擾民兼靠害，唔怪得業主怨聲四起喇。

最好笑嘅係，消防官僚對住老弱婦孺就話擺晒官威，公事公辦啫，但面對傳媒質詢咯喎，即刻鵪鶉咁款，話理解個別樓宇受條件所限未必可以跟足法例做，處方會喺唔損害消防安全嘅前提下酌情處理喎。

唔係啩，對業主百般恐嚇，又要拉人又要封艇，咁都叫酌情處理？正如有業界人士話齋，消防處執行條例從來都係一刀切，要求業主一係做足全套，一係暫緩工程，好多舊樓因為達唔到要求一直拖延，連最基本嘅火警鐘都未安裝。消防官僚一成不變，唔識轉膊，如果因為咁而搞出人命，呢條數邊個孭先？

講開又講，消防處一向不務正業，應做嘅唔做，唔應做嘅亂做，市民早就見怪不怪咯。近年唔少食肆向高空發展，搞到「食廈」遍地開花，安全隱患處處，消防處闊佬懶理，關人個關；又好似新界村屋咁吖，本報曾經踢爆唔少人走法律罅，按規定安裝消防設備，攞咗「滿意紙」之後即刻拆走，而消防處居然收到投訴都唔做嘢，到依家仲係零檢控，真係唔到你唔服。

嗱，咪話太一叮唔提醒，家陣香港七國咁亂，民怨一觸即發，任何小事都可能爆大鑊o架。消防處繼續無事生非，添煩添亂，遲早官逼民反，搞出個大頭佛嘅咋，叮！