政府尋日公布市區重建局新一輪非官方執董名單,白鴿黨立法會議員胡志偉、公文袋嘅議員郭榮鏗同建制派嘅工聯會議員麥美娟,將會出任市建局非官方執董,任期由下月起至一六年十一月三十日。

設計圖片及對白

除咗郭榮鏗係續任之外,胡麥二人都係新委任嘅,而喺黨內擔任房屋政策發言人嘅胡志偉更加係接替即將離任嘅黨友、超級區議員涂謹申個位。

泛民主派之前揚言為咗配合佔領行動嘅抗爭,於是發起不合作運動,繼泛民立法會議員就「搶攻」財務委員會轄下嘅工務同人事編制小組委員會,取得兩個小組嘅控制權後,上月包括涂謹申在內嘅十隻白鴿區議員先至話要辭去撲滅罪行委員會委員公職,轉個頭依家兩位泛民議員又接受政府委任公職,難免予人覺得佢哋嘅做法係自相矛盾。莫非佢哋戀棧權位,選擇性參與不合作運動?

盧偉國任醫管局成員

另外,政府尋日亦委任咗工程界議員盧偉國任醫院管理局非官方成員,任期兩年,同樣都係下個月生效。而中央政策組喺上月中亦都更新咗佢哋嘅特邀顧問名單,提出「十三學者」政改方案嘅香港大學工程學院名譽教授關品方,以及離島區議員周浩鼎都榜上有名。

周浩鼎話今年六、七月時已經獲委任,可能因為政府有意發展大嶼山,而佢又係離島區議員,加上有法律背景,所以政府先搵佢喎。

第一手消息請下載on.cc東網iPhone/iPad/Android/Windows Phone Apps