政壇：鄉事派洗建仔底保選票
新界鄉議局即將踏入選舉年，明年初起一連舉辦村代表、鄉事委員會同鄉議局選舉，間接影響埋直落嘅區議會選舉，可謂各大選舉前哨戰。過去鄉議局同建仔喺選舉上一直係密不可分嘅好拍檔，但近年雙方關係已大不如前。據知兼任建仔西貢將軍澳支部副主席嘅西貢鄉事委員會副主席邱全，近日更決定退黨保平安，以免影響村代表以至鄉委會選情。
事緣經歷多次選舉後，新界人開始不滿建仔「有事鍾無艷」，淨係識搵新界人過橋，選票、着數攞到盡，但幾乎冇回報，鮮有為新界人發聲，加上早前「反佔中」鄉紳淪為建仔布景板，唔少鄉紳佛都有火。故身兼建仔身份嘅鄉紳自然首當其衝，除平時閒言閒語，選舉期間幫建仔助選就更被指「手指拗出唔拗入」。
我哋問過邱全，佢承認確係退咗黨，而且同村代表選舉有「少少」關係，但佢強調村民冇畀壓力佢，只係有感多年來對建仔冇乜貢獻，無謂嘥咗個位喎。睇嚟邱全退黨只係鄉事派退出建仔嘅序幕，日後定必好戲連場。
