香港多個政黨陸續組團去台灣,為咗今日舉行嘅「九合一選舉」取經。立法會議員梁美芬周三率先拉隊抵台,計劃五日內行勻高雄、台南、台中同台北取經,首站先拜會民進黨高雄巿市長候選人陳菊嘅競選總部。梁美芬仲乘機向陳菊嘅競選宣傳策略偷師,想話設計番套「鼠王芬」精品當選舉宣傳,認真睇得開。

梁美芬(左)日前拜會陳菊競選總部。(互聯網圖片)

「花媽」陳菊舊年因為其圓潤身形配一頭鬈髮,造型似足日本卡通角色「花媽」(香港譯「花師奶」)而得名,陳菊嘅競選團隊亦順水推舟,設計一系列花媽造型嘅卡通精品,令陳菊紅上加紅。梁美芬眼見陳菊利用精品殺出血路,不但即場買咗套「花媽」耳機孔防塵塞留念,有隨行團友便建議佢以其花名「鼠王芬」為噱頭,推出一系列「鼠王芬」精品,話唔定大受歡迎喎。其實網民早喺梁美芬參選一二年立法會選舉時,已經幫佢設計咗唔少「惡搞」圖,相信佢唔使頭痕點樣設計喇!

第一手消息請下載on.cc東網iPhone/iPad/Android/Windows Phone Apps