政壇：《港人講地》話畀《港地》冒認

自稱由一班有承擔、愛香港人士成立嘅《港人講地》經常喺社交網站嘅專頁發表文章，多唔多人睇就唔知嘞，但近日就疑似畀一個名為《港人港地》嘅社交網站專頁冒認，事關《港人港地》嘅徽標設計同顏色都同《港人講地》極之相似。《港人講地》尋日就發聲明，呼籲大家提高警覺，留意呢個懷疑欺詐嘅專頁，又話有關專頁涉嫌侵犯版權、惡意假冒及中傷《港人講地》，強調《港人講地》同有關專頁並無關連，佢哋會保留法律追究嘅權利喎。