「西餅皇后」Maria李曾超群、廉政公署前副廉政專員Tony郭文緯同有「大會堂之父」稱號嘅藝術發展局前主席Darwin陳達文,尋日獲港大專業進修學院頒發首屆榮譽院士。退休十二年嘅Tony,六十七歲依然活躍,唔止係楊家太極高手,思想仲與時並進。

郭文緯(中)獲兩位孫女送上祝賀,甜到入心。

講起時下眾多青年人上街抗爭,Tony苦口婆心,勸青年人唔好自視過高:「大學畢業只係開始,唔好以為大學生就一定有份幾萬蚊嘅工作等緊你,青年人要不斷進修學習,否則只會被社會淘汰。」

Tony並唔係得個講字,佢都以身作則推動國際反貪課程十多年。日前佢就帶一批來自印尼同非洲尼日利亞嘅反貪官員嚟香港上堂,除咗參觀政府部門外,仲去佔領區巡視。班外國官員一睇,驚訝香港本來井然有序,而且經濟繁榮,但依家搞到立立亂,認真身在福中不知福喎。

第一手消息請下載on.cc東網iPhone/iPad/Android/Windows Phone Apps