當好多香港人為買唔買一層幾百萬嘅樓而煩惱時，小米科技創始人雷軍喺短短五分鐘內就決定豪擲一億元人仔，投資YOU+國際公寓，咁果斷嘅魄力都唔係個個有錢人有o架。

雷軍

除咗賣手機成為內地銷量一哥外，雷軍今次真正踩過界，涉足埋房地產。YOU+嘅商業模式就係租咗成棟樓之後，重新改裝再租畀一班啱啱踏入社會工作嘅青年人，建立一個更緊密嘅社區環境畀佢哋可以更好咁交流。雷軍仲要做「有態度嘅公寓」，希望針對幫一啲單身嘅年輕人，所以有資料指出，青年公寓有「三不租」：四十五歲以上嘅唔租；結咗婚嘅唔租；唔鍾意識朋友嘅唔租。YOU+國際青年公寓嘅創始人劉洋仲透露，雷軍見到內地好多年輕人都面臨租樓難題，所以決定幫佢哋一把，而現有喺廣州嘅兩座公寓，月租就喺二千至三千元人仔，嚟緊新一間亦即將喺北京接受預租。

其實雷軍喺年初都已經講過想投資埋房地產，不過認真度過之後都係覺得要專心做手機業務，所以放棄咗房地產嘅發展，今次投資YOU+國際公寓都可以話係圓咗雷軍個夢，難怪佢諗咗五分鐘就扑錘喇！

第一手消息請下載on.cc東網iPhone/iPad/Android/Windows Phone Apps