政壇：陳曼琪人氣升或接替橄欖
話時話，建仔嘅「橄欖」陳鑑林做咗十幾年立法會議員，預計做多兩年就退休，佢嘅九龍東議席由邊個接棒仍係未知之數。據講目前該黨有幾個人選，包括觀塘區議員柯創盛同洪錦鉉、黃大仙區議員陳曼琪同黎榮浩，大家都磨拳擦掌爭出線。不過，近日佔領行動成為社會熱門議題，而代表潮聯小巴公司申請旺角禁制令嘅律師陳曼琪忽然人氣急升，分分鐘有機會跑出接替橄欖個議席。
設計圖片及對白
陳曼琪十年前當選黃大仙區議員，本來只係寂寂無聞，但自從佢兩年前創立香港中小型律師行協會兼做埋會長後，不時就唔同法律議題發表意見。再加上律師會會長林新強早前因發表擁護共產黨言論而被會員以大比數罷免後，香港中小型律師行喺各項反佔中活動中愈行愈前，成功吸引唔少市民注意。
及至佔領行動爆發，陳曼琪不時出嚟批評佔中破壞法治，佢之後更加代表潮聯小巴公司向法庭入稟申請旺角禁制令，要求重開旺角彌敦道一帶馬路。之後仲代表小巴公司聯同執達主任去旺角宣讀禁制令內容，仲一度同學聯常委梁麗幗爭拗禁制令內容，令佢成為建制派之間嘅風頭躉。
律師形象利吸中產票
據聞建制派中人對陳曼琪嘅表現大為欣賞，覺得佢除咗唔怕班聲大夾惡嘅佔領人士外，解釋禁制令內容時亦都有理有節，認為佢喺旺角清場行動上應記一功。雖然陳曼琪係建仔黨員，但經過禁制令一役後，佢嘅律師形象已經深入民心，反而無乜人記得佢個政黨身份，對吸引中產票源簡直百利而無一害。
正因為得到建制派叔父輩垂青，陳曼琪下屆接替橄欖出選九龍東嘅行情暫時被看高一線。不過，政治一日都嫌長，距離下屆選舉仲有兩年，期間發生咩事都無人知，佢係咪保持到人氣，咁就要拭目以待嘞！
