政客拉布阻基建 政府變招亦枉然

呢，前日立法會工務小組委員會又拖垮咗三項總值逾二百五十億元嘅重要工程撥款，包括中部水域人工島策略性研究等，至於其他同樣有爭議性嘅工程撥款，睇怕都係凶多吉少咯。面對咁嘅形勢，港府又點樣應戰呢？據講當局將會變招，計劃將部分受到拉布影響嘅工程項目及開位建議直接提上財委會，變相將被反對派佔領嘅工務小組及人事編制小組廢武功喎。

呢招可以稱為釜底抽薪，聽落似模似樣，但實際可唔可行，真係令人懷疑。係人都知，家陣成個立法會烏煙瘴氣，所有委員會都唔例外，有人為反對而反對，為拉布而拉布，就算港府將工程項目直接提上財委會，一樣會受阻嘅啫。講到底，反對派全面不合作，有破壞冇建設，無論港府點樣變招，都係嘥氣咋。

正所謂，黃台之瓜，何堪再摘，好多基建工程本來已嚴重延誤兼超支，加上政客阻頭阻勢，簡直係雪上加霜。就以前朝政府嘅所謂十大基建嚟講，由於拖拖拉拉，成本節節上升，保守估計合共超支逾千億元。好似爭議不斷嘅港珠澳大橋香港口岸工程咁吖，當初核准預算大約三百億元，家陣估計最少要增加五十億元，最終埋單計數可能仲唔止添吖，問你怕未。

立法會拉布不止，除咗導致基建延誤兼超支，而且隨時搞到工人失業。由十幾個建造業團體組成嘅建造業大聯盟，日前操到立法會請願，要求議員停止拉布，以免延誤工程撥款，令業界冇工開。業界人士係咁講嘅，受到拉布影響，好多項目遲遲未能開工，導致上個立法年度實際批出嘅工程總額減至三十六億元，遠遠低於前一個年度嘅逾九百億元，唔少承辦政府工程嘅中小企由於無以為繼而被迫結業，再咁落去，建造業隨時爆發裁員潮都似。

所以話，一損俱損，家陣有人佔領街頭，有人佔領立法會，搞到成個社會停擺，七百萬人都冇運行，受影響嘅又點止建造業吖。正如車公話齋，禍去禍來因自招。政客無良，政府無能，香港遲早畀佢哋玩死嘅咋，叮！