城中鏡：劉仲恒大近視 唔做機師做醫師
每個人都有願望，而願望成真基金尋日舉行「分享願望的喜樂」開幕禮，助患有重病嘅兒童達成願望。人人都有夢想，基金主席Kevin劉仲恒笑言童年嘅願望係當飛機師，可惜太勤力讀書，結果搞到大近視，機師最終做唔成，但就做咗醫生。
劉仲恒（右）係梁卓偉學生，兩人極啱傾。
馬露明（右）同媽咪馬王培琪現身撐場。
彭耀佳喜見基金幫助病童圓夢。
愛妻助圓飛行夢
雖然童年願望落空，但Kevin太太即商務及經濟發展局前局長馬時亨大女馬露明，就深明老公心意，兩年前帶Kevin去學駕駛直升機，畀佢一嘗衝上雲霄嘅滋味。Kevin現時經過激光矯視後，已經唔需要戴眼鏡，未來有機會可能學揸小型飛機添！愛妻咁貼心幫佢完成夢想，Kevin都好識做，揚言會努力學跳舞，打算兩年後結婚五周年時，同鍾意跳舞嘅太太舉辦派對共舞，真係甜到漏。
香港大學醫學院院長Gabriel梁卓偉中途趕至，原來佢同Kevin係兩師徒，當年Kevin就讀大學一年級時，Gabriel剛回港執教鞭，由於兩人都曾在加拿大生活，特別啱傾，Kevin賣口乖話，獲良師啟發唔少。
香港總商會主席彭耀佳都有到場，講起聖誕節，佢話依家啲小朋友好醒目，加上資訊咁發達，佢嘅一對仔女三歲左右已知道聖誕老人只係扮出嚟，真正送禮物畀佢哋嘅係爸爸。佢話節日最緊要係一家人一齊，做乜嘢都唔緊要，得閒攬吓太太同一對仔女已經好滿足。
