SUN搞作：打橫嚟講：我要真鳩污

香港廢柴政府高層曾呼籲市民在旺角清場後去MK消費，一直以來，香港市民對那些狗噏廢話毫無好感的，俗啲講法，係「睬佢都生臭狐」，哼！點知，今劑，香港人竟十分響應政府呼籲，旺角佔領區一清剿晒之當晚，就紛紛湧去鳩污消費。

世事好反常的，旺角不少商戶投訴佔領行動令他們生意大減，家陣，清場後得到政府最高層的引導，人流大增，本應好Happy至啱o架！

點知仲衰過舊時，原因係可能因為怕「人多擠迫」而實施封路管制兼驅趕人群，並引發衝突，嚇得彌敦道後街兩旁的店舖關門大吉，賺少多覺瞓！箇中內情，有點古怪失常！

其實，香港廢柴政府所有高官，好應為社會和諧出嚟做番啲嘢，例如劑劑高調帶頭，硬撐反佔領簽名活動的食衞局高醫生，應分首先行出嚟，以醫學角度講解食飽飯後，每日出街行十五至三十分鐘，那對身體健康有益的重要嘛！所以，佢要晚晚去MK散步，支持佢老頂吧！

此外，高醫生老頂亦唔好得個齋噏，須冚家晚晚到旺角鳩污，以身作則，建設香港繁榮也！

作為香港好市民，無理由唔望振興香港經濟，但若去旺角鳩污的話，就千祈唔好戴口罩，即使有流感病都咁話，因嗰度啲差人，一見人戴住口罩，就當你係賊咁(目及)到實，好恐怖！

查實，鳩污無罪，行街有理的，而且，仲係香港政府最高層的聖諭，響應吓都被人打穿頭？好變態啫！

我哋已經無真普選o架啦！連鳩污都無埋？「我要真鳩污」！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊(目及)實政府