政壇：搞搞政：扶貧委會流會議員卸責藉口多
話說立法會扶貧小組委員會尋日八點半召開今個立法年度第二次會議，討論婦女貧窮問題，小組委員會共有二十二位成員，法定嘅開會人數係至少七位。點知包括小組委員會主席馮檢基在內，只有六位議員準時現身，其中四位為建制派，泛民兩人。連本身係小組委員會副主席嘅張超雄都冇出席，結果馮檢基惟有宣布流會。
設計圖片及對白
「AV仁」聲稱要去早餐會
原本答應會出席但最後甩底或者遲到嘅共有七位議員，五名泛民包括白鴿黨嘅「AV仁」何俊仁、李卓人、梁耀忠、郭家麒同「長毛」梁國雄，建制派議員就有梁志祥同鄧家彪。甩底議員例牌藉口多多，AV仁話係參加一個早餐會，但同邊個食就唔肯講。
據聞梁耀忠遲咗半小時，趕到時已經流咗會。日前喺旺角佔領區被拘捕嘅長毛，因為尋日朝早被押解咗去法院外，被迫甩底。李卓人就話尋日朝早要開會，所以遲到，但問到開乜嘢會，佢又係唔肯透露。至於張超雄就去咗電台做直播節目，所以未能開會。搞到流會，佢話要同公眾及參與會議嘅婦女組織道歉。
至於建制派方面，梁志祥就話近日元朗有巴士路線重組，佢原本打算朝早七點幾喺元朗視察路線重組後，街坊搭車嘅情況，然後再趕返立會開會，估唔到遲咗十幾分鐘，返到去已經流會。不過，點解佢早唔視察，晚唔視察，係都要尋日朝早去呢？講到呢度，大家係咪對議員的藉口感到厭倦呢？都係鄧家彪老實啲，佢坦白承認係自己「衰仔」，將時間校得太緊迫，搞到趕唔切，所以要同市民講句對唔住咁話。
