政壇：鄭志剛揼本為品牌揚名

周大福今年做成咗上市以嚟第一單收購──奢侈珠寶品牌Hearts on Fire（HOF），為咗隆重其事，尋日佢哋喺上海搞咗個品牌「亮相」儀式同晚宴，全場包括燈光都以紫色布置，所有參加人士都需要有紫色元素，相當大陣仗。

鄭志剛希望新品牌到一九年開到三百間分店。

身為呢個project嘅揸fit人、集團接班人Adrian鄭志剛尋日話，下個月聖誕前會喺上海開第一間HOF分店，仲話對珠寶前景好有信心，遲吓會喺南京同海南開埋，至於香港就仲搵緊舖，目標係中環同尖沙咀地區，照計劃出年三月底前喺中港兩地開到五間HOF，目標到二○一九年開到三百間咁多添！

Adrian不忘「賣花讚花香」，話HOF嘅鑽石係全人手完美對稱切割，8心8箭嘅設計令鑽飾更加閃爍，不過入場費就要四至五萬蚊港紙喇！佢仲話HOF依家除咗美國外，台灣都有百幾間，而且成績都好理想，所以佢對引入嚟香港同內地市場都好有信心咁話。