富貴黨嘅立法會飲食界議員張宇人自從做咗財委會主席，零舍意氣風發，尋日佢突然喺電台爆肚話，富貴黨其實無乜自由，自己好多時候都係跟黨立場投票，名副其實係「撳掣機器」喎。佢從政十幾年，竟然公開承認自己係「撳掣機器」，如果佢咁無奈，點解唔退黨算罷呢？

張宇人

佢話富貴黨無自由，因為唔少議題唔屬於自己負責，所以投票立場要跟隨黨嘅主張。講到呢度，佢又話自己唔適合從政，因為佢高唔高興都擺晒上塊面度，唔似得有啲人咁叻可以收埋晒喎。佢咁講又得罪人喇，係人都聽到句句有骨，擺明係寸緊某啲人啫！

講起富貴黨，如無意外現任副主席方剛將於下月初正式接任黨魁，咁邊個代替方剛呢？張宇人一早表明無意做，黨內嘅選擇其實唔太多，估計係時候畀生力軍出線喇！

第一手消息請下載on.cc東網iPhone/iPad/Android/Windows Phone Apps