政壇：梁繼昌嘥20萬煲無米粥
對香港打工仔嚟講，超時工作可以話係家常便飯，但應唔應該為標準工時立法，社會至今仍然存在好大分歧。立法會會計界議員梁繼昌就豪花二十萬元，用咗半年時間研究專業會計師嘅工時狀況同佢哋對立法規管標準工時及最高工時嘅睇法。研究結果顯示業界僱主唔贊成立法，怕增加經營成本，但打工仔就支持立法，認為可以減少無償加班。
設計圖片及對白
議題敏感大行反應淡
梁繼昌就話個結果都係佢意料之內，只係想搵數據支持下業界諗法啫。花咁多錢竟然得出個「阿媽係女人」嘅結果，仲係煲無米粥添，咁咪等如倒錢落海，梁繼昌都真係捨得喇！
梁繼昌早前委託香港中文大學邀請業界進行多場焦點小組討論同填寫問卷。梁繼昌話標準工時對大會計師行嚟講係「政治敏感」議題，叫佢哋回應仲難過叫佢哋評論佔領行動喎。
研究團隊收番嘅近七百份問卷就顯示，八成半受訪者每周加班一次，有五成三每周加班多過五小時，多過十一小時嘅都有三成。雖然分別有超過八成同七成嘅受訪者支持就標準工時同最高工時立法，但超過四成都覺得不可行。
對呢個表面上好似幾矛盾嘅結果，梁繼昌話預咗，仲形容好似民主政制咁，個個都想要，但對於人大決定下嘅政改方案可能有啲人會選擇啃住先。咁點睇就標準工時立法嘅呢？佢認為某啲行業係要立法，只係豁免係必須喎。
梁繼昌就話，勞工及福利局局長張建宗同標準工時委員會主席梁智鴻都已經請佢將研究結果交畀佢哋，佢自掏腰包幫政府做研究，唔知可唔可以向政府申請番啲津貼咁呢？
