拉布斷人衣食 政客自取滅亡
好咯，邪不能勝正，旺角被佔領近兩個月，尋日終於成功清場，還路於民。不過唔好開心得太早喎，事關反對派喺立法會大搞不合作運動，唔係拉布，就係流會，民生議案堆積如山，呢啲人形路障一日唔清除，香港想有運行都幾難。
嗱，反對派唯恐天下不亂，有破壞冇建設，早就唔係新聞嘞，不過衰到斷人衣食，阻人生計，咁就認真折墮咯。尋日立法會工務小組委員會開會，十五個建造業團體忍無可忍，組成大聯盟踩場抗議。大聯盟發言人係咁講嘅，多得反對派拉布，上個財政年度獲批嘅基建工程總額只有三十六億元，遠遠不及前年嘅九百零九億元。唔使兩年，建造業工人就會因為工程不足，失業率倒退至○三年沙士水平；而中小企未能承辦政府工程，更可能引發倒閉潮，問你死未。
反對派係又拉布，唔係又拉布，打爛工人飯碗，簡直唔係人吖。話時話，港府尋日突然抽起中部水域人工島研究撥款文件，雖然冇解釋原因，但係人都知，根本係怕咗反對派拉布。講起就激氣咯，呢項工程計劃關乎香港未來發展大計，本來可創造大量職位，偏偏反對派係都要唱反調，由上年拖到今年，審批仲係遙遙無期，有冇再離譜啲吖！
講開又講，立法會復會只係短短兩個月，當局已經唔止一次抽起議案，好似前排先至抽起十三項由上年積壓落嚟嘅議案，包括興建學校及體育館等民生工程。所以話，反對派點止阻人搵食，直情令全港市民受害喇。唔係講笑呀，連同當局今年提交嘅工程撥款議案，足足有成八十九項，時間不等人，反對派死拖爛拖，阻住地球轉，工程成本必然暴增，社會發展更加停滯不前，經濟民生遲早玩完嘅咋。
最令人睇唔過眼嘅係，反對派賊喊捉賊，反指政府唔肯調動議程，令經濟民生議程無法提前審議喎。喂，明明自己玩嘢，仲惡人先告狀，咁仲成世界嘅？再講吖，香港不嬲行政主導，幾時輪到反對派想點就點呀？上樑不正下樑歪，身為立法會議員其身不正，冇規冇矩，唔怪得年輕人有樣學樣，日日上街反政府喇。
再咁落去，立法會癱瘓，政府停擺，社會空轉，香港唔沉淪就奇咯。計太一叮話齋，善有善報，惡有惡報，反對派繼續擇惡固執，禍港殃民，遲早票債票償，被選民踢出下屆立法會，叮！
