城中鏡：又忙又減肥 邱詠筠清瘦晒
帝盛酒店太子女Winnie邱詠筠打理嘅酒店版圖愈嚟愈大，成日飛嚟飛去，真係忙到不得了，尋日見到佢清瘦咗唔少。不過，佢話唔單止因為忙，原來佢係刻意減肥嘅，仲分享咗個七日排毒減肥餐單出嚟，佢自己試過好得，依家連屋企人都一齊試緊，仲講笑話目標全家人一共減肥一百磅咁話！
邱詠筠話唔單止因為忙而瘦咗，仲係刻意減肥嘅。（資料圖片）
其實Winnie接手咗酒店業務以嚟，成績真係有目共睹，品牌搞到有聲有色。佢好開心話英國酒店業務依家已經逐步上軌道，入住率都有百分之七十，相信等酒店經營成熟後，入住率有信心去到百分之九十，仲話會繼續喺英國物色合適嘅發展機會喎。
講到佔中嘅影響，公司就話入住率冇變，係房價有啲影響，因為少咗外國遊客嚟，做多咗內地團就會令房價有壓力，不過依家睇聖誕節訂房表現都唔差喎。
