城中鏡：金刀梁邀出山 許冠文搞笑籌款
有「冷面笑匠」之稱嘅Michael許冠文近年已好少再開金口，但日前就特別幫香港愛滋病基金會慈善晚宴「棟篤笑」籌款，引來笑聲連場。請得郁Michael「出山」嘅，全靠基金會主席「金刀梁」梁智鴻發功。為答謝老友幫手，金刀梁回敬厚禮，笑言Michael將來萬一感染愛滋病，願意免費送上每杯價值萬多元嘅「何氏雞尾酒（療法）」，話會醫足佢一世喎。
梁智鴻（左）與香港愛滋病基金會創會主席林貝聿嘉（右）齊力邀許冠文（中）做「棟篤笑」籌款。
林李婉冰（右二）出動大仔嘉豪（右一）、二仔嘉傑（左一）及細女嘉寶（左二）幫手賣獎券籌款。
茹素嘅楊大偉伉儷（左一及二）照樣買枱做善事，香港國術總會會長王嘉恩（右一）就發燒都同太太Pauline（右二）捧場。
楊大偉茹素 買枱唔要肉
好耐無表演，Michael搞笑本色依舊，揮灑自如，自嘲對愛滋病一竅不通，但有感社會對此病忌諱多多，有必要挺身宣揚一下。金刀梁搵笑匠站台，只因愛滋病喺全球依然嚴峻，每十二秒就有一個新症誕生，防治工夫刻不容緩。基金會副主席Nina林李婉冰都好認同，拍心口擔大旗做晚宴籌委會主席，搵酒家以優惠價贊助「富豪宴」。
東華三院前主席李三元、總理馮少雲、太子珠寶鐘錶主席鄧鉅明同Green Monday創辦人David楊大偉齊買枱支持。不過，David指定佢嗰圍要食素，聽落畀十幾萬買圍枱食素，好似唔多抵，但佢笑言志不在食番夠本，而係「做得我嘅朋友，當然要Go Green！」
中國愛滋病防治行動香港委員會副主席李麗娟，都同細妹李桂蘭合共捐出兩萬多元首飾供大會抽獎。金刀梁太太馮令儀當晚戴上自製紅珠仔心口針捧場，果然鴻運當頭中頭獎，捧走價值萬多元嘅鑽石頸鏈，認真幸運。
