「香港已死」，這是十七年前一份鬼佬雜誌封面故事對香港的判決，今天，我哋可以好大聲回應，喂！不是「香港」已死，而係「香港法治」已死！

昨日清障行動，旺角佔領區彌敦道地段村民近乎零反抗的撤離，真係估佢哋唔到。

仲估唔到的，還是黃昏放工後，香港聽話的市民，應呼籲清場後要去旺角消費，點不知，釀成全港任何「人類」不得在彌敦道上停留，有好多特區差人封守住晒，逼人行去彌敦道旁的砵蘭街或西洋菜街。嘿！不旋踵，兩條小街又被特區差人重重封鎖，還發生暴力推撞人群，當然，又有人倒地受傷，跟住，咪又起哄拉人打人告人囉！總之，一定係市民唔啱！

家陣，香港人真係可憐！連做個聽話聽教的好市民支持聖諭也分分鐘會被摳穿頭同抓上法庭去，點算好？真無所適從！

昨天早上，彌敦道清場過程，叫港人心噏！本是按法庭頒布的禁制令，香港警方只能「協助」執達吏清理路障的，怎知變成主動「掃場」，當局竟回應說這是「果斷行動」，喂！香港行大陸公安嗰套吖？定係按香港法律的呢？請問！

當一個執法部門再無誠信的時候，正是他們被人們唾棄的時候；而一個政府再不依法辦事的時候，正是他們滅亡的時候。

我一直說不是「香港已死」，而係「香港法治已死」，因為，我對香港仍有希望，「希望」的根源，因看到香港人對法治和正義的執着與堅持！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊(目及)實政府

第一手消息請下載on.cc東網iPhone/iPad/Android/Windows Phone Apps