政壇：10%美國人撈亂蓋茨喬布斯
一般人要認出國際名人邊個打邊個，應該冇難度，但點知，外國最新有調查發現，竟然有一成美國成年人，把微軟創辦人蓋茨，同蘋果公司（Apple Inc.）已故創辦人、教主喬布斯攪亂。
有一成美國人將蓋茨（右）同喬布斯（左）攪亂。（資料圖片）
調查係美國皮尤研究中心進行嘅，一共訪問咗一千零六十六個、至少會偶爾使用互聯網或移動設備嘅美國成年人。其中，百分之八十三嘅受訪者可以從照片中認出蓋茨（亦即係有百分之十七認唔出蓋茨）。知名度也許較低嘅facebook營運總監桑德伯格，更只有百分之二十一人認得。而最令人驚奇嘅，係有百分之十受訪者把蓋茨錯認成喬布斯。
唔單止認人差，受訪者嘅IT知識都好一般。調查發現，只有百分之七十四人知道1MB大過1KB；又只有百分之三十六人知道第一代iPhone係喺○七年發布嘅。此外，只有唔夠一半嘅受訪者明白，單單因科技公司制訂咗私隱政策，並不代表佢哋會把訊息保密。另只有百分之二十三知道「互聯網」同「萬維網」係有分別嘅。
