政壇：港大兩新副校長出爐
香港大學尋日公布高層變動嘅消息，香港賽馬會前高層蘇彰德獲委任為副校長（大學拓展），任期五年。港大畢業、「空降」出任副校長嘅蘇彰德回覆記者時話，對獲委任感到好榮幸，雖然佢未曾喺大專院校工作，但有多年嘅行政及管理經驗，亦曾參與唔少有關教學同科研嘅項目發展工作，了解大學面對嘅挑戰，未來將專注為大學籌款、拓展校友及社區關係。
相機收藏家蘇彰德獲委任為港大副校長（大學拓展），任期五年。（資料圖片）
本身係Leica相機收藏家嘅蘇彰德，早前卸任香港賽馬會慈善、法律事務同公司秘書處執行總監一職後，斥資九千萬元購下跑馬地一幢第三級歷史建築，創辦香港首間攝影博物館，推動香港攝影藝術嘅發展。港大同時宣布，委任政治與公共行政學系教授Ian Holliday為副校長（教學），來自美國嘅古典研究學系教授Derek Collins則會擔任文學院院長，任期均為五年。
另外，港大首席副校長錢大康已知會校務委員會，佢喺明年七月約滿後不再續約，但會繼續擔任計算機科學系講座教授，港大成立物色委員會為首席副校長一職物色適當人選，並委派顧問機構展開全球招聘工作。
