為咗唔想儲蓄被通脹蠶食,立法會每年都會攞部分現金投資股票,希望以小博大賺番啲回報。不過,根據立會行政管理委員會尋日發表一三/一四年報,雖然顯示上個財政年度嘅投資收入多達五百九十七萬元,但未出售嘅股票帳面就錄得一百一十六萬元虧損,莫非立會投資小組投資失利,搞到依家成手「蟹貨」?

梁君彥

立法會投資顧問小組成員、保險界議員陳健波就解釋,雖然帳面上睇到立會揸住成手「蟹貨」,但由於當時三月尾恒生指數只得二萬二千點,依家升到超過二萬四千點,估計帳面都有斬獲,而顧問小組今日亦會開會檢討投資組合。不過,據講當初立會已沽出一批股票獲利,而呢批「蟹貨」只係沽剩嘅部分,但點解要沽剩呢批股票呢?

雖然立會投資乜嘢股票係保密,但另一投資顧問小組成員梁君彥就話大部分現金都攞晒去做定期,亦會不時按股市最新情況買入唔少股票,希望可以賺番少少幫補吓。由於立會一分一毫都係由納稅人埋單,所以投資時要好小心,盡量揀啲利息豐厚同有穩定增長嘅藍籌股。

至於立會上個財政年度嘅收益,獲得六億八千萬元撥款,較去年度多出三千七百多萬元。陳健波話由於立法會今個年度開新位要使多成二千多萬元,再加上職員加薪,令佢哋要向政府申請更多撥款。不過,相比起一二/一三年度錄得超過一千三百萬元赤字,今年有超過三百八十四萬盈餘,成績算係唔錯喇!

第一手消息請下載on.cc東網iPhone/iPad/Android/Windows Phone Apps