政壇：黃灝玄離商經局甩難
官場音樂椅尋日又再轉動，外號「頭箍小姐」嘅財經事務及庫務局常任秘書長（財經事務）區璟智，鐵定喺下月底正式告別三十二年嘅公務員生涯，享受無官一身輕嘅退休生活，而佢個位就由商務及經濟發展局（工商及旅遊）常任秘書長黃灝玄接手。黃灝玄任內嘅老頂、商務及經濟發展局局長Greg蘇錦樑處理多個具爭議性嘅議題，黃灝玄今次過檔可算係甩難喇，啲炸彈就留番畀接佢手嘅政務官拆嘞！
設計圖片及對白
對比區璟智，黃灝玄接手商經局嘅過去三年可謂「難關重重」，好似被揭多筆糊塗帳嘅盛事基金、免費電視發牌風波，及被謔稱為「網絡廿三條」嘅《版權（修訂）條例草案》等極具爭議嘅議題都係黃灝玄負責，更要頻頻幫手孭鑊，認真吃力不討好。
雖則話財經事務及庫務局工作未必可以獨善其身好清閒，但黃灝玄具備商經局工作經驗，本身亦同商界稔熟，加上一度有傳「胎死腹中」嘅滬港通最後都成功通車，相信黃接任壓力都冇咁大。
容偉雄接手三煞位
其實，區璟智今次退休牽連政府多個決策局大執位，黃灝玄調任後嘅空缺由旅遊事務專員容偉雄接手，特區政府駐北京辦事處主任朱曼鈴就會回港接任旅遊事務專員。睇到咁嘅布局，即係話容偉雄同朱曼鈴就要識得拆彈嘞！老實講，容偉雄之前因為郵輪碼頭同審計署批評盛事基金糊塗帳等都捱轟，依家佢上位，名副其實係孭重飛，係咪拆到彈亦或被炸？咁就真係祝佢好運嘞！
再講，至於朱曼鈴個位就由民政事務局副秘書長傅小慧接棒，未來一段時間要到北京生活。
